ആറാഴ്ചയിലേറെ ചൊറിച്ചിലും തടിപ്പും ആവർത്തിച്ചാൽ ശ്രദ്ധിക്കണം; ക്രോണിക് അർട്ടിക്കേരിയയാകാം
 

കൊച്ചി: ശരീരത്തിൽ ആവർത്തിച്ചുണ്ടാകുന്ന ചൊറിച്ചിലും തടിപ്പും എല്ലായ്പ്പോഴും അലർജി മൂലമാകണമെന്നില്ലെന്നും, ആറാഴ്ചയിലേറെ ഇത്തരം ലക്ഷണങ്ങൾ തുടരുകയോ ആവർത്തിക്കുകയോ ചെയ്യുന്ന സാഹചര്യത്തിൽ ക്രോണിക് സ്പോണ്ടേനിയസ് അർട്ടിക്കേരിയ (സി എസ് യു ) എന്ന അവസ്ഥയുടെ സാധ്യത പരിഗണിക്കണമെന്നും കൊച്ചിയിലെ അമൃത ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ ഡെർമറ്റോളജി വിഭാഗം പ്രൊഫസർ ഡോ. സൗമ്യ ജഗദീശൻ പറഞ്ഞു.

“ആവർത്തിച്ചുള്ള ചൊറിച്ചിലും തടിപ്പും പലപ്പോഴും അലർജിയാണെന്ന് അനുമാനിക്കപ്പെടുന്നു. എന്നാൽ രണ്ടും എല്ലായ്പ്പോഴും ഒരുപോലെയല്ല. വ്യക്തമായ കാരണങ്ങളില്ലാതെ രോഗലക്ഷണങ്ങൾ തുടരുകയോ മടങ്ങിവരികയോ ചെയ്യുമ്പോൾ ക്രോണിക് സ്പോണ്ടേനിയസ് അർട്ടിക്കേരിയ ആണെന്ന് പരിഗണിക്കേണ്ടത് പ്രധാനമാണ്,” എന്ന് ഡോ. സൗമ്യ ജഗദീശൻ പറഞ്ഞു.

സി എസ് യു വിൽ ഓരോ തടിപ്പും സാധാരണയായി 24 മണിക്കൂറിനുള്ളിൽ അപ്രത്യക്ഷമാകുമെങ്കിലും ശരീരത്തിന്റെ മറ്റു ഭാഗങ്ങളിൽ പുതിയ തടിപ്പുകൾ പ്രത്യക്ഷപ്പെടാം. ഭക്ഷണം, മരുന്നുകൾ, ചർമ്മസംരക്ഷണ ഉൽപ്പന്നങ്ങൾ എന്നിവ ഒഴിവാക്കുന്നതുകൊണ്ട് എല്ലാ സാഹചര്യങ്ങളിലും ലക്ഷണങ്ങൾ മാറണമെന്നില്ല. ചില ഘടകങ്ങൾ രോഗലക്ഷണങ്ങൾ വഷളാക്കാമെങ്കിലും അവയാണ് രോഗത്തിന്റെ യഥാർഥ കാരണമെന്ന് ഉറപ്പിക്കാനാവില്ല.

തുടർച്ചയായ ചൊറിച്ചിൽ ഉറക്കക്കുറവ്, പകൽസമയത്തെ ക്ഷീണം, ദൈനംദിന പ്രവർത്തനങ്ങളിൽ ശ്രദ്ധ കേന്ദ്രീകരിക്കാനുള്ള ബുദ്ധിമുട്ട് എന്നിവയ്ക്കും കാരണമാകാം. രോഗലക്ഷണങ്ങളുടെ ദൈർഘ്യവും രീതിയും വിലയിരുത്തി ഡെർമറ്റോളജിസ്റ്റിനോ അലർജിസ്റ്റിനോ ആവശ്യമായ പരിശോധനകളും ചികിത്സയും നിർദേശിക്കാനാകും. വ്യക്തമായ കാരണമില്ലാതെ തടിപ്പുകൾ ആവർത്തിക്കുകയോ ആറ് ആഴ്ചയിലേറെ തുടരുകയോ ചെയ്യുന്നവർ വൈദ്യപരിശോധന തേടേണ്ടതാണ്.