ഒക്ടോബറോടെ കോവിഡ് മൂന്നാം തരംഗം ; ; കുട്ടികളിലും രോഗവ്യാപനം വര്ധിക്കാന് സാധ്യത;
രാജ്യത്ത് ഒക്ടോബര് മാസത്തോടെ കോവിഡ് 19 മൂന്നാം തരംഗം ഉണ്ടാവുമെന്ന് റിപ്പോര്ട്ട്. നാഷണല് ഇന്സ്റ്റിറ്റ്യൂട്ട് ഓഫ് ഡിസാസ്റ്റര് മാനേജ്മെന്റിനു കീഴില് രൂപവത്കരിച്ച സമിതിയാണ് ഇതു സംബന്ധിച്ച് റിപ്പോര്ട്ട് പ്രധാനമന്ത്രിയുടെ ഓഫീസിന് നല്കിയിരിക്കുന്നത്. കേരളത്തിലും വടക്കുകിഴക്കന് സംസ്ഥാനങ്ങളിലും കോവിഡ് വ്യാപന തോത് ഉയര്ന്നു നില്ക്കുന്ന സാഹചര്യം കൂടി കണക്കിലെടുത്താണ് റിപ്പോര്ട്ട് നല്കിയിരിക്കുന്നതെന്നാണ് സൂചന.
മൂന്നാം തരംഗത്തില് ഒന്നും രണ്ടും തരംഗങ്ങളില്നിന്നു വ്യത്യസ്തമായി കുട്ടികളിലും രോഗവ്യാപനത്തിനു സാധ്യതയുണ്ടെന്ന് റിപ്പോര്ട്ട് മുന്നറിയിപ്പു നല്കുന്നു. ഡോക്ടര്മാര്, ജീവനക്കാര്, വെന്റിലേറ്ററുകള്, ആംബുലന്സ് തുടങ്ങിയവയുടെ എണ്ണം വര്ധിപ്പിക്കേണ്ടതുണ്ടെന്ന് റിപ്പോര്ട്ട് പറയുന്നു. എല്ലാ ആശുപത്രികളിലും പീഡിയാട്രിക് വാര്ഡുകള്, പീഡിയാട്രിക് ഐസിയുകള് എന്നിവയുടെ എണ്ണവും വര്ധിപ്പിക്കണമെന്നും റിപ്പോര്ട്ടില് പറയുന്നു.
കുട്ടികളുടെ ആരോഗ്യാവസ്ഥ കണക്കിലെടുത്ത് വാക്സിനേഷനില് മുന്ഗണന നല്കണം. അനാരോഗ്യവും വൈകല്യങ്ങളുമുള്ള കുട്ടികള്ക്ക് വേഗത്തില് വാക്സിന് നല്കേണ്ടത് അത്യാവശ്യമാണെന്നും റിപ്പോര്ട്ടില് പറയുന്നു.
മൂന്നാം തരംഗം ഒക്ടോബര് അവസാന ആഴ്ചയോടെ ഉച്ചസ്ഥായിയില് എത്തുമെന്നാണ് വിലയിരുത്തല്. നിലവില് ആശുപത്രികളിലുള്ള കിടക്കകള്, ഓക്സിജനറേറ്ററുകള് തുടങ്ങിയവയൊക്കെ കോവിഡ് മൂന്നാം തരംഗത്തെ നേരിടാന് അപര്യാപ്തമാണെന്ന് റിപ്പോര്ട്ടില് ചൂണ്ടിക്കാണിച്ചിട്ടുണ്ട്.