ഒമിക്രോണ്: മുന്കരുതലുകള് സ്വീകരിച്ചതായി ആരോഗ്യ മന്ത്രി
വിദേശ രാജ്യങ്ങളില് കോവിഡിന്റെ പുതിയ വകഭേദമായ ‘ഒമിക്രോണ്’ കണ്ടെത്തിയ സാഹചര്യത്തില് കേന്ദ്ര മാര്ഗനിര്ദേശമുസരിച്ച് മുന്കരുതലുകള് സ്വീകരിച്ചതായി ആരോഗ്യ വകുപ്പ് മന്ത്രി വീണാ ജോര്ജ്. യു.കെ. ഉള്പ്പെടെയുള്ള യൂറോപ്യന് രാജ്യങ്ങളും, മറ്റ് 11 രാജ്യങ്ങളും ‘ഹൈ റിസ്ക്’ രാജ്യങ്ങളാണെന്ന് കേന്ദ്രം അറിയിച്ചിട്ടുണ്ട്. ഈ രാജ്യങ്ങളില് നിന്നു വരുന്നവരെ പ്രത്യേകം നിരീക്ഷിക്കും. ഇവര്ക്ക് വിമാനത്താവളങ്ങളില് അര്ടിപിസിആര് പരിശോധന നടത്തും. പരിശോധന നടത്തി ഫലം നെഗറ്റീവാണെങ്കില് ഹോം ക്വാറന്റീനിലായിരിക്കണം. എട്ടാം ദിവസം വീണ്ടും പരിശോധന നടത്തണം. അതുകഴിഞ്ഞ് വീണ്ടും 7 ദിവസം വരെ സ്വയം നീരീക്ഷണം തുടരണം. പോസിറ്റീവായാല് അവരെ പ്രത്യേകം സജ്ജീകരിച്ച വാര്ഡുകളില് പ്രവേശിപ്പിച്ച് ചികിത്സ ഉറപ്പ് വരുത്തും. അവര്ക്കായി പ്രത്യേകം വാര്ഡുകള് ക്രമീകരിക്കുമെന്നും മന്ത്രി വ്യക്തമാക്കി.
കേരളത്തില് ഇതുവരേയും ഒമിക്രോണ് വേരിയന്റ് കണ്ടെത്തിയിട്ടില്ല. ഹൈ റിസ്ക് അല്ലാത്ത രാജ്യങ്ങളില് നിന്നും വരുന്നവരില് 5 ശതമാനം പേരുടെ സാമ്പിളുകള് ഇത്തരത്തില് പരിശോധനയ്ക്ക് അയക്കണമെന്നാണ് കേന്ദ്രത്തിന്റെ മാര്ഗ നിര്ദേശം. ഈ രാജ്യങ്ങളില് നിന്നും വരുന്നവരും സ്വയം നിരീക്ഷണം നടത്തണം.
നാല് വിമാനത്താവളങ്ങളിലും ആരോഗ്യ പ്രവര്ത്തകരെ നിയോഗിച്ചിട്ടുണ്ട്. ഇവര് മറ്റ് ഡിപ്പാര്ട്ടുമെന്റുകളുമായി സഹകരിച്ച് ക്വാറന്റീന് ഉള്പ്പെടെയുള്ള കാര്യങ്ങള് നിര്വഹിക്കും. കോവിഡ് മൂന്നാം തരംഗം മുന്നില് കണ്ട് സംസ്ഥാനം നേരത്തെ തന്നെ മുന്നൊരുക്കം നടത്തിയിരുന്നു. ആശുപത്രികളില് ഓക്സിജന് സ്വയംപര്യാപ്തത കൈവരിക്കാനായെന്നും മന്ത്രി വ്യക്തമാക്കി.