യുവ സംഗമം പരിപാടിയിൽ പങ്കെടുക്കാൻ ഉത്തർപ്രദേശിൽ നിന്നെത്തിയ സംഘത്തിന് കേരളത്തിലെ ലോക് ഭവനിൽ ഊഷ്മള സ്വീകരണം

ഭാരത സർക്കാരിന്റെ 'ഏക് ഭാരത്, ശ്രേഷ്ഠ ഭാരത്' പദ്ധതിക്ക് കീഴിലുള്ള 'യുവ സംഗമം' പരിപാടിയുടെ ഭാഗമായി ഉത്തർപ്രദേശിൽ നിന്നും കേരളത്തിൽ വിദ്യാഭ്യാസ-സാംസ്കാരിക പര്യടനത്തിനെത്തിയ വിദ്യാർത്ഥി സംഘം ഇന്ന് രാജ്ഭവനിൽ വെച്ച് ബഹുമാനപ്പെട്ട കേരള ഗവർണർ ശ്രീ ഓം പ്രകാശ് മാഥൂറുമായി കൂടിക്കാഴ്ച നടത്തി. ഈ സംവാദ പരിപാടിയിൽ ബനാറസ് ഹിന്ദു സർവ്വകലാശാലയിലെ പ്രൊഫസർ ഡോ. ബാലാ ലഖേന്ദ്രയും പാലക്കാട് ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (ഐ.ഐ.ടി.) പ്രൊഫസർ വിനീത് നാരായണനും വിദ്യാർത്ഥി സംഘത്തോടൊപ്പം  സന്നിഹിതരായിരുന്നു. 

കൂടിക്കാഴ്ചയിൽ വിദ്യാർത്ഥികൾ തങ്ങളുടെ കേരള സന്ദർശനത്തിലെ അവിസ്മരണീയമായ അനുഭവങ്ങൾ ഗവർണറുമായി പങ്കുവെച്ചു. 
കേരളത്തിന്റെ തനതായ ഭക്ഷണരീതികൾ, സുഖകരമായ കാലാവസ്ഥ, സമ്പന്നമായ ജൈവവൈവിധ്യം, വനമേഖലകൾ എന്നിവ ഞങ്ങളെ വളരെയധികം സ്വാധീനിച്ചതായി  വിദ്യാർത്ഥികൾ പറഞ്ഞു.

വിദ്യാർത്ഥികളെ അഭിസംബോധന ചെയ്തുകൊണ്ട് സംസാരിച്ച ഗവർണർ അവർക്ക് ശോഭനമായ ഭാവി ആശംസിക്കുകയും 'യുവ സംഗമം' പോലുള്ള പദ്ധതികൾ ഇന്ത്യയെ ഒരൊറ്റ ചരടിൽ കോർത്തിണക്കുന്നുവെന്നും പ്രധാനമന്ത്രിയുടെ 'ഏക് ഭാരത്, ശ്രേഷ്ഠ ഭാരത്' എന്ന സ്വപ്നം യാഥാർത്ഥ്യമാക്കുന്നുവെന്നും പറഞ്ഞു. നമ്മുടെ രാജ്യത്തിന് സമ്മിശ്ര സംസ്കാരമാണുള്ളതെന്നും വിവിധ സംസ്ഥാനങ്ങളുടെ സംസ്കാരം അടുത്തറിയാൻ ഇന്ത്യയിലെ യുവാക്കളെ പ്രാപ്തരാക്കുക എന്നതാണ് ഈ പരിപാടിയുടെ പ്രധാന ലക്ഷ്യമെന്നും അദ്ദേഹം എടുത്തുപറഞ്ഞു.

യുവാക്കൾക്ക് മാർഗ്ഗനിർദ്ദേശം നൽകിക്കൊണ്ട്, പുതിയൊരു ചുറ്റുപാടിലാണ് നിങ്ങൾ എത്തിയിരിക്കുന്നതെന്നും അതിനാൽ വ്യത്യസ്തമായ കാര്യങ്ങൾ കണ്ടെത്താനും പുതിയ അറിവുകൾ നേടാനും നിരന്തരം ശ്രമിക്കണമെന്നും അദ്ദേഹം പറഞ്ഞു. യാത്രകൾ നമുക്ക് വ്യത്യസ്തമായ അനുഭവങ്ങൾ നൽകുന്നുണ്ടെന്നും, അതിനാൽ ഈ അനുഭവങ്ങൾ ശേഖരിച്ച് സൂക്ഷിക്കേണ്ടതുണ്ടെന്നും അദ്ദേഹം നിർദ്ദേശിച്ചു. ഇന്നത്തെ കാലഘട്ടത്തിൽ നമ്മുടെ സ്ത്രീസമൂഹം മുന്നോട്ട് വരികയും എല്ലാ മേഖലകളിലും സജീവമായി പങ്കാളികളാവുകയും ചെയ്യണമെന്നും പറഞ്ഞു. ഗവർണറുടെ സ്നേഹത്തിനും മാർഗ്ഗനിർദ്ദേശത്തിനും ആതിഥ്യമര്യാദയ്ക്കും വിദ്യാർത്ഥി സംഘം നന്ദി രേഖപ്പെടുത്തി.

രാജ്യത്തെ വൈവിധ്യമാർന്ന സംസ്കാരങ്ങൾ, ഭാഷകൾ, പാരമ്പര്യങ്ങൾ, ജീവിതശൈലികൾ എന്നിവയ്ക്കിടയിൽ പരസ്പര ധാരണയും ഐക്യവും പ്രോത്സാഹിപ്പിക്കുക എന്ന ലക്ഷ്യത്തോടെ ഭാരത സർക്കാർ ആവിഷ്കരിച്ച സുപ്രധാന പദ്ധതിയാണ് 'ഏക് ഭാരത്, ശ്രേഷ്ഠ ഭാരത്'. ഈ പരിപാടി വിവിധ സംസ്ഥാനങ്ങളിലെ ജനങ്ങളെ പരസ്പരം സംസ്കാരം, കല, സാഹിത്യം, പാരമ്പര്യങ്ങൾ എന്നിവയുമായി പരിചയപ്പെടുത്തുന്നു. ഇതിലൂടെ ദേശീയ ഐക്യം, സാഹോദര്യം, സൗഹാർദ്ദം, രാജ്യസ്നേഹം എന്നിവ ശക്തിപ്പെടുന്നു. 'നാനാത്വത്തിൽ ഏകത്വം' എന്ന ഭാരതീയ ആദർശം സാക്ഷാത്കരിച്ചുകൊണ്ട് രാജ്യത്തിന്റെ പുരോഗതിയിലും സമൃദ്ധിയിലും ഈ സംരംഭം നിർണ്ണായക സംഭാവന നൽകുന്നുണ്ട്.
രാജ്യത്തെ യുവാക്കളിൽ ദേശീയ ഉദ്ഗ്രഥനം, സാംസ്കാരിക അവബോധം, പരസ്പര സഹകരണം എന്നിവ വളർത്തിയെടുക്കുക എന്ന ലക്ഷ്യത്തോടെ ഭാരത സർക്കാരിന്റെ വിദ്യാഭ്യാസ മന്ത്രാലയം 'ഏക് ഭാരത്, ശ്രേഷ്ഠ ഭാരത്' പദ്ധതിക്ക് കീഴിൽ കഴിഞ്ഞ കുറച്ച് വർഷങ്ങളായി 'യുവ സംഗമം' പരിപാടി സംഘടിപ്പിച്ചു വരുന്നു. 

ഈ പരിപാടിയിലൂടെ വിവിധ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും വിദ്യാർത്ഥികൾക്ക് മറ്റ് സംസ്ഥാനങ്ങളുടെ സംസ്കാരം, ഭാഷ, ഭക്ഷണം, വസ്ത്രധാരണം, ചരിത്രസ്ഥലങ്ങൾ, വികസന പ്രവർത്തനങ്ങൾ എന്നിവ മനസ്സിലാക്കാൻ അവസരം ലഭിക്കുന്നു. പദ്ധതിക്ക് കീഴിൽ വാരണാസിയിലെ ബനാറസ് ഹിന്ദു സർവ്വകലാശാല ജേർണലിസം ആൻഡ് മാസ് കമ്മ്യൂണിക്കേഷൻ വിഭാഗം പ്രൊഫസർ ബാലാ ലഖേന്ദ്രയുടെ നേതൃത്വത്തിൽ 55 അംഗ സംഘം (50 വിദ്യാർത്ഥികളും 5 അധ്യാപകരും) നവംബർ 2 മുതൽ നവംബർ 16 വരെ ഐ.ഐ.ടി പാലക്കാടിന്റെ ആതിഥേയത്വത്തിൽ കേരളത്തിലെ വിവിധ സാംസ്കാരിക-മത പ്രാധാന്യമുള്ള സ്ഥലങ്ങൾ സന്ദർശിച്ചുവരികയാണ്.