അനന്തപുരി പുഷ്പോത്സവവും പെറ്റ് ഷോയും തിരക്കേറുന്നു

വർണ്ണ വൈവിധ്യമൊരുക്കി അനന്തപുരി പുഷ്പോത്സവവും പെറ്റ് ഷോയും ജനശ്രദ്ധയാകർഷിച്ചു മുന്നേറുന്നു. മേള ഡിസംബർ 12ന് സമാപിക്കും.
ലുലു മാളിനു സമീപമുള്ള വേൾഡ് മാർക്കറ്റ് മൈതാനിയിൽ നടക്കുന്ന പുഷ്പമേളയും അരുമപ്പക്ഷി ഓമന മൃഗ പ്രദർശനവും വൻ ജന പങ്കാളിത്തത്തോടെ മുന്നേറുന്നു. 

ഇന്ത്യയിലും വിദേശങ്ങളിലുമുള്ള അത്യപൂർവമായ പുഷ്പങ്ങൾ കൊണ്ട് ഒരുക്കിയിട്ടുള്ള ഇൻസ്റ്റലേഷനുകൾ ഈ പുഷ്പമേളയുടെ പ്രധാന ആകർഷണമാണ്.സെൽഫി പോയിൻ്റുകൾ ധാരാളമായി സെറ്റ് ചെയ്തിട്ടുണ്ട്. അത്യപൂർവമായ വർണ്ണമത്സ്യങ്ങളും അരുമപ്പക്ഷികളും ഓമന മൃഗങ്ങളും ഒത്തുചേരുന്ന പെറ്റ് ഷോ കൗതുകക്കാഴ്ചകളാണ് സമ്മാനിക്കുന്നത്.ഇവയോടൊപ്പം സെൽഫി എടുക്കാൻ വൻ തിരക്കാണ് അനുഭവപ്പെടുന്നത്.

കുട്ടികൾക്കുള്ള ഗയിം ഷോ, ദിവസേന കലാസന്ധ്യകൾ എന്നിവയും പുഷ്പോത്സവ നഗരിയിലുണ്ട്. നാളെ (ശനി) മുതൽ കലാനിധി ട്രസ്റ്റിൻ്റെ നേതൃത്വത്തിൽ നടക്കുന്ന വാർഷികോത്സവങ്ങളിൽ പ്രശസ്ത സിനിമാ സീരിയൽ താരങ്ങളും ഗായകരും പങ്കെടുക്കുന്നുണ്ട്. ദിവസവും രാവിലെ 11 മുതൽ രാത്രി 10 വരെയാണ് പ്രദർശനം. മേളയിൽ പങ്കെടുക്കുന്നവരിൽ നിന്ന് നറുക്കെടുപ്പിലൂടെ ഒട്ടേറെ സമ്മാനങ്ങളും നൽകുന്നു.