എഴുത്തുകാരി സാറാ തോമസ് അന്തരിച്ചു

പ്രശസ്ത എഴുത്തുകാരി സാറാ തോമസ് നിര്യാതയായി. 88 വയസായിരുന്നു. തിരുവനന്തപുരം നന്താവനത്തെ വീട്ടിലായിരുന്നു അന്ത്യം. നോവലിസ്റ്റ്, ചെറുകഥാകൃത്ത് എന്നീ നിലകളിൽ ശ്രദ്ധേയയായിരുന്നു. 1934 ൽ തിരുവനന്തപുരത്തായിരുന്നു ജനനം.

ജീവിതം എന്ന നദി ആണ് ആദ്യ നോവൽ. നാർമടിപ്പുടവ, തണ്ണീർപ്പന്തൽ, കാവേരി, യാത്ര എന്നിവ ശ്രദ്ധേയ കൃതികളാണ്. നാർമടിപ്പുടവക്ക് 1979-ലെ കേരള സാഹിത്യ അക്കാദമി പുരസ്കാരം ലഭിച്ചു. മുറിപ്പാടുകൾ, പവിഴമുത്ത്, അസ്തമയം, അർച്ചന എന്നീ നോവലുകൾ സിനിമകൾക്ക് പ്രമേയമായി.

കേരള സാഹിത്യ അക്കാദമി അവാർഡ് ഉൾപ്പെടെ നിരവധി ബഹുമതികൾ ലഭിച്ചിട്ടുണ്ട്. സംസ്കാരം നാളെ ഉച്ചയ്ക്ക് രണ്ട് മണിക്ക് പാറ്റൂർ മാർത്തോമ്മാ പള്ളി സെമിത്തേരിയിൽ.