'വിജയോത്സവം 2023' വിദ്യാർത്ഥികളെ കാണാൻ മന്ത്രി കെ. രാധാകൃഷ്ണൻ സ്ക്കൂളിൽ

 പ്ലസ്ടു പരീക്ഷയിൽ 100 ശതമാനം വിജയം നേടിയ തിരുവനന്തപുരം ജില്ലയിലെ ഏക സർക്കാർ വിദ്യാലയമായ  ശ്രീ അയ്യൻകാളി മെമ്മോറിയൽ ഗവൺമെന്റ് മോഡൽ റസിഡൻഷ്യൽ സ്‌പോർട്‌സ് സ്‌കൂളിൽ വിജയോൽസവം നടത്തി.  2022-23 അധ്യയന വർഷത്തിൽ എസ്.എസ്.എൽ.സി, പ്ലസ്ടു പരീക്ഷകളിൽ 100 ശതമാനം വിജയം കൈവരിച്ച വിദ്യാർത്ഥികളെയും വിവിധ സ്‌പോർട്‌സ് മീറ്റുകളിൽ ജില്ലാ, സ്റ്റേറ്റ്, നാഷണൽ ലെവലുകളിൽ വിജയിച്ച വിദ്യാർത്ഥികളെയും അനുമോദിച്ചു. 'വിജയോത്സവം 2023' പരിപാടിയുടെ ഉദ്ഘാടനം പട്ടികജാതി -പട്ടികവർഗ്ഗ- പി നാക്ക വിഭാഗക്ഷേമ വികസന വകുപ്പ് മന്ത്രി കെ.രാധാകൃഷ്ണൻ നിർവഹിച്ചു. 

പഠനത്തിലും കായിക മേഘലയിലും മികവ് പുലർത്തി സർക്കാർ മോഡൽ റസിഡൻഷ്യൽ സ്‌കൂളുകളിലെ കുട്ടികൾ രാജ്യത്തിന് അഭിമാനമായി മാറണമെന്ന് മന്ത്രി പറഞ്ഞു. ഇത്തരം സർക്കാർ സ്‌കൂളുകളിലേക്ക് കൂടുതൽ കുട്ടികളെ കൊണ്ടുവരാൻ അധ്യാപകരും അനധ്യാപകരും ജനപ്രതിനിധികളും ഇടപെടണമെന്നും ഹോസ്റ്റൽ ഉൾപ്പെടെയുള്ള എല്ലാ സൗകര്യങ്ങളും കുട്ടികൾ പരമാവധി പ്രയോജനപ്പെടുത്തണമെന്നും മന്ത്രി കൂട്ടിചേർത്തു. ചടങ്ങിൽ എം. വിൻസന്റ് എം.എൽ.എ അധ്യക്ഷനായി.

2023-24 അധ്യയന വർഷത്തെ അക്കാദമിക മാസ്റ്റർ പ്ലാൻ 'പടവുകൾ' മന്ത്രിയും  എം.എൽ.എയും ചേർന്ന് പ്രകാശനം ചെയ്തു. എസ്.എസ്.എൽ.സി പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയ അഭിനയ.എ യ്ക്ക് വാർഡ് മെമ്പറും ഹെഡ്മിസ്ട്രസ്സും ക്യാഷ് അവാർഡുകൾ നൽകി. 

ജിംനാസ്റ്റിക്‌സ് മത്സരത്തിൽ നാഷണൽ തലത്തിൽ വിജയിച്ച ആറാം ക്ലാസ് വിദ്യാർഥികളായ അഭിയാ ബിജു, ശില്പ കെ. എസ്, ധീരജ്. ആർ , ജൂഡോയിൽ ദേശീയ തലത്തിൽ വിജയിച്ച പ്ലസ് വൺ വിദ്യാർത്ഥി അക്ഷയ എസ്.ബി, പത്താം ക്ലാസ് വിദ്യാർത്ഥി അഭിനയ.എ എന്നിവരെ ചടങ്ങിൽ അനുമോദിച്ചു.