ട്രെയിനിലെ തീവയ്പ്: എൻഐഎ സംഘം കണ്ണൂരിൽ,
യുപിയിൽ രണ്ടുപേര്‍ കസ്റ്റഡിയിലെന്ന് സൂചന
Apr 4, 2023, 15:16 IST
ആലപ്പുഴ -കണ്ണൂര്‍ എക്‌സിക്യൂട്ടീവ് എക്‌സ്പ്രസ്സില്‍ പെട്രോള്‍ ഒഴിച്ച് തീയിട്ട സംഭവത്തില്‍ ദേശീയ അന്വേഷണ ഏജന്‍സി(എന്‍.ഐ.എ) പരിശോധനയ്‌ക്കെത്തി. അക്രമസംഭവം അരങ്ങേറിയ രണ്ടുകോച്ചുകളാണ് എന്‍.ഐ.എ. സംഘം പരിശോധിച്ചത്.
കണ്ണൂര്‍ റെയില്‍വേ സ്‌റ്റേഷന്‍ യാര്‍ഡിലാണ് തീവെയ്പ്പുണ്ടായ ഡി-1 ബോഗിയും ഡി-2 ബോഗിയുമുള്ളത്. ചൊവ്വാഴ്ച കണ്ണൂരിലെത്തിയ മൂന്നംഗ എന്‍.ഐ.എ. സംഘം ഈ രണ്ട് ബോഗികളും വിശദമായി പരിശോധിച്ചു. കേസുമായി ബന്ധപ്പെട്ട കൂടുതല്‍ വിവരങ്ങളും ശേഖരിച്ചു.
അതേസമയം, എലത്തൂര്‍ ട്രെയിന്‍ തീവെപ്പുമായി ബന്ധപ്പെട്ട് ഉത്തര്‍പ്രദേശില്‍ വ്യാപക അന്വേഷണം നടക്കുന്നതായാണ് വിവരം. സമാനപേരുള്ള രണ്ടുപേരെ ഉത്തര്‍പ്രദേശ് എ.ടി.എസ് കസ്റ്റഡിയിലെടുത്തതായും സൂചനകളുണ്ട്. ഉത്തര്‍പ്രദേശിലെ ബുലന്ദ്ഷഹറില്‍നിന്നും മോദിനഗറില്‍നിന്നുമാണ് രണ്ടുപേരെ കസ്റ്റഡിയിലെടുത്തതെന്നാണ് വിവരം.