ബ്രൂസ് ലി ഓര്മ്മയായിട്ട് 48 വര്ഷം
കുങ്ഫു എന്ന ചൈനീസ് ആയോധനകലയെ ആഗോള തലത്തില് ജനപ്രിയമാക്കിയ ബ്രൂസ് ലി (ലീ ജുന് ഫാന് ) ഓര്മ്മയായിട്ട് 48 വര്ഷം. മെയ്വഴക്കം കൊണ്ട് ലോകം കീഴടക്കിയ ഇദ്ദേഹം ചലച്ചിത്ര നടൻ, തത്ത്വചിന്തകൻ എന്നീ നിലകളിലും പ്രശസ്തനായിരുന്നു.18-ാം വയസ്സിൽ സഹപാഠിയിൽ നിന്നും ക്രൂരമായി മർദ്ദനമേറ്റ ലീ സ്വരക്ഷയ്ക്കായിട്ടാണ്
ആയോധനകല അഭ്യസിച്ചു തുടങ്ങിയത്. 1958-ൽ ഹോങ്കോങിൽ നടന്ന ബോക്സിങ് മത്സരത്തിൽ ചാമ്പ്യനായതോടെ ഇദ്ദേഹം ബോക്സിങ്, കരാട്ടെ, കുങ്ഫു എന്നീ മേഖലകളിൽ ലോകശ്രദ്ധ പിടിച്ചുപറ്റി. ബാലനടനായി ചലച്ചിത്രരംഗത്ത് എത്തിയ ലീ 18 വയസ്സായപ്പോഴേയ്ക്കും ഇരുപതോളം ചലച്ചിത്രങ്ങളിൽ അഭിനയിച്ചു കഴിഞ്ഞിരുന്നു. നിരവധി ടെലിവിഷൻ പരമ്പരകളിലും ഇദ്ദേഹം വേഷമിട്ടു.1971-ൽ തായ്‌ലാന്റിൽ ചിത്രീകരിച്ച ആദ്യ ചിത്രം ‘Tan Shan da Xiong’ , ഹോങ്കോങിൽ വലിയ ചലനമുണ്ടാക്കി. തൊട്ടുപിന്നാലെ പുറത്തുവന്ന ‘ഫിസ്റ്റ് ഓഫ് ഫ്യുറി’യും അതുവരെയുണ്ടായിരുന്ന കളക്ഷൻ റെക്കോർഡുകൾ ഭേദിച്ചു. തുടർന്ന് ലോകജനശ്രദ്ധ പിടിച്ചുപറ്റിയ നിരവധി ആക്ഷൻ ത്രില്ലർ ചിത്രങ്ങൾ ഇദ്ദേഹത്തിന്റേതായി പുറത്തുവന്നു. 32-ാം വയസ്സിൽ ‘ഗെയിം ഓഫ് ഡെത്ത് ‘ എന്ന ചിത്രത്തിന്റെ ശബ്ദലേഖനം നടക്കുന്നതിനിടയിൽ ലീ അപ്രതീക്ഷിതമായി കുഴഞ്ഞു വീണു മരിക്കുകയായിരുന്നു. ഇദ്ദേഹത്തിന്റെ ദുരൂഹമായ മരണത്തെ കുറിച്ച് നിരവധി ആരോപണങ്ങളും കഥകളും അക്കാലത്ത് പ്രചരിച്ചിരുന്നു.